सरकारको बन्दाबन्दी गर्ने कुनै योजना छैन : स्वास्थ्य मन्त्रालय

असोज १७, काठमाडौँ । स्वास्थ्य तथा जनसंख्या मन्त्रालयले २५ हजार सक्रिय संक्रमित भए पनि बन्दाबन्दी नगरी तिनको व्यवस्थापन गर्न सकिने बताएको छ ।

यही असोज ७ गते स्वास्थ्य सचिव लक्ष्मण अर्यालका अध्यक्षतामा बसेको इन्सिडेन्ट कमाण्ड सिस्टमको बैठकले २५ हजार सक्रिय संक्रमित भएमा सरकार मातहत रहेका अस्पतालले उपचारको व्यवस्थापन गर्न नसक्ने बताउँदै सरकारलाई बन्दाबन्दी गर्न सिफारिस गर्ने निर्णय गरेको थियो ।

मन्त्रालयका प्रवक्ता डा जागेश्वर गौतमले मन्त्रालयको बन्दाबन्दी गर्ने योजना नभएको स्पष्ट पारे । सक्रिय संक्रमित २५ हजार पुगेपछि निजी स्वास्थ्य संस्था र होटेलमा राख्ने योजना सरकारले राखेको छ । सरकारले गत चैत ११ गतेदेखि साउन ६ गतेसम्म बन्दाबन्दी तथा भदौ ४ गतेदेखि अन्तिम सातासम्म काठमाडौं उपत्यकामा निषेधाज्ञा लागू गरेको थियो ।

‘मुलुकमा फेरि पनि बन्दाबन्दी गर्ने योजना रहेको छैन’, उनले भने, ‘अहिलेकै अवस्थामा संक्रमित बढ्न थालेपछि सरकार संरचनाले थेग्न नसक्ने भनेको हो । तैपनि हामी निजी स्वास्थ्य संघसंस्थासँगको सहकार्यमा संक्रमितको उपचार गर्छौं ।

उनका अनुसार सक्रिय २५ हजार संक्रमित भएका खण्डमा ५ हजार लक्षण भएका संक्रमित रहने छन् । तिनलाई आवश्यक शय्या सरकारसंँग छ । अहिले ८२ हजार ४५० जना संक्रमितमध्ये २१ हजार २३४ जना सक्रिय संक्रमित छन् । यस्तै ६० हजार ६९६ जना निको भएका र ५२० जनाको संक्रमणको कारणले निधन भएको छ । अहिले २ हजार ६०० सघन उपचार कक्ष, ९०० ओटा भेन्टिलेटर र २० हजार ७६५ ओटा आईसोलेशन शय्या छन् ।

शुक्रवारनै स्वास्थ्यमन्त्री भानुभक्त ढकालले नेपाल उद्योग वाणिज्य महासंघ र राष्ट्रिय व्यावसायिक पहलका प्रतिनिधिसँग भेटी बन्दाबन्दी तत्काल नहुने जनाउँदै हल्लाको पछि नलाग्न अनुरोध गरेका छन् ।

व्यवसायीले विस्तारै उद्योगधन्दा खुल्न लागेका अवस्थामा फेरि बन्दाबन्दीको हल्लाले त्रसित बनेको बताउँदै स्वास्थ्य मापदण्ड पालना गरेर व्यवसाय सञ्चालन गर्न आफूहरु तयार रहेको बताए ।

अहिले बन्दाबन्दी खुलेसँगै सबै क्षेत्र खुला गरिएको छ । यही असोज १ गतेदेखि लामो दूरीका यातायात सेवा र असोज ५ गतेदेखि हवाई सेवा सञ्चालन गरिएको छ । रासस

प्रकाशित मिति १७ आश्विन २०७७, शनिबार ०४:३२